Friday, June 1, 2012

දිවි අරුත සරු කරන ගී


සඳක් සදිසි ළඳක් කොහෙද
ලැසි ගමනින් යන
අසන්නට සිතයි ඔබගෙන්
වත ගොත යන තැන

ලාලිත්‍යයෙන් පිරි සුන්දර යුවතියක් අතරමගදී හමුවූ තරුණයෙක් ඇගෙන් ඇසූ ප‍්‍රශ්නයකි මේ.
ගියොත් කෙනකු යළිත් නොඑන
තැන ඇති කුඹුරක
පියා සී සායි මම බත
ගෙනයමි හනිකට

ඇගේ පිළිතුර ඇය, ඔහුට පැනයක් විසඳීමෙන් ලබා ගැනුමට සලසාලයි.
සොහොන් බිම අසල කුඹුරක
වෙහෙසෙයි තම පියා
ඔහුට ඇඹුල ගෙනයන ඔබ
කියන් කවුද කියා.

තරුණයා ඉතා ඉක්මනින් පිළිතුර සොයාගනී. සැනින් දෙවන ප‍්‍රශ්නය ඇයට ඉදිරිපත් කරයි.
පමාවේය හිමියනි මම ඔබගෙන් සමුගමි
නොමැරෙන යම් කෙනෙක් වේද ඒ නම මට හිමි

දෙවනවරටද ඇය පිළිතුරු සපයන්නේ පැනයක් විසඳීමෙන් ලබා ගැනුමටය.
අමරා දේවි ඔබ අමරාදේවි
තරුණයා බුද්ධිමත්ය. ඇගේ නම පමණක් නොව ඇගේ නුවණ ද ඔහු තේරුම් ගනී. පසුකලෙක ඔහු සරණ පාවා ගන්නේද ඇයයි.
ගීතයෙන් විදහාලන්නේ උම්මග්ග ජාතක කතා වස්තුවේ මහෝෂධ කුමරු සහ අමරා කුමරිය ප‍්‍රථම හමුවීමේදී සිදුවන කතාන්දරයයි.
එම කතාවේ ඔවුන් දෙපලගේ පැන-විසඳුම් අවස්ථාව ස්වර්ණදාස හේරත් ගී පද රචකයා අපූරුවට රචනා කර ඇත. කතා වස්තුවෙන් විදහාලන ප‍්‍රඥාව මනාලෙස ශ‍්‍රාවකයාට හඟවන සුළුය.
ඊට අනුරූප වන පරිදි දයාරත්න රණතුංග මහතාගේත් අමරා රණතුංග මහත්මියගේත් හඬ ගලායයි. ඒ හඬට ස්ටැන්ලි එම්. ප‍්‍රනාන්දු මහතාගේ සංගීත සුසංයෝගය කදිමය.
හේරත් මහතාගේ වදන් සරලය. එය සුගායනීයය. මෙම ත‍්‍රිත්වයේ එක්කාසුවේ අපූරු ඵලය නෙලාගන්නට නම් ඔබද බුද්ධිමත් විය යුතුමය.
වර්තමානයේ අසන්නට දකින්නට වෙන සිදුවීම්වල ආරම්භය අතරමග හමුවී ඉතා ඉක්මනින් සබඳතා ගොඩනඟා ගන්නා අයගෙනි.
මෙවන් ගීතවල අන්තර්ගතයට ළංවන්න ළංවන්න ඔබගේ ප‍්‍රඥාවද වර්ධනය වනවා නොඅනුමානය. ගීතයේ රසයෙන් ආනන්දයක් ලබනවා මෙන්ම එහි හරවත් බව තේරුම් ගෙන ආනන්දයෙන් ප‍්‍රඥාවට ළඟාවිය හැකිය.
තනුජා එන්. අයගම
(උපුටා ගැනීම මාර්තු කලාපයෙන්)

No comments:

Post a Comment