Friday, June 1, 2012

හොඳම දවස අදයි


වින්සන්ට් පීල් මහතා හමුවීමට උදෑසනම එක්තරා පුද්ගලයකු පැමිණ සිටියේය.
‘‘මට හරියට ප‍්‍රශ්න තියෙනවා. මේ දවස්වල කරන කිසිම වැඩක සාර්ථකත්වයක් දකින්න නැහැ. හැමදාම උදේ අවදිවෙන්නේ හිසේ ලොකු බරක් තියාගෙනයි.’’
ඔහුගේ මැසිවිලි හා දුක්ගැනවිලි සියල්ල සන්සුන්ව අසා සිටි වින්සන්ට් පීල් මෙසේ පැවසීය.
‘‘අද ඉතා සුබ දවසක් බව සමහර විට ඔබ දැනගෙන හිටින්න නැතුව ඇති.’’
‘‘ඇත්තටම අද සුබ දවසක්ද? මම ඒ ගැන දැනගෙන හිටියෙ නැහැ.’’
‘‘දැන් මම සූදානම්ව හිටියේ හිත ගත දෙකම සන්සුන් කරවන අන්දමේ අභ්‍යාසයක් ප‍්‍රගුණ කරන්නයි. මෙය ඉතාම පැරණි අභ්‍යාසයක්. නවීන අය බොහෝ දෙනකු මේ ගැන දන්නෙ නැහැ. ඔබත් ඇයි මේ ක‍්‍රමය අත්හදා නොබලන්නේ?’’
තියෙන කරදර මදිවාට තව මොන අභ්‍යාසද යනුවෙන් අමුත්තාට සිතිණි. උදෑසන ලාහිරු රැස් සහිත ගෙමිදුලේ හාන්සි පුටු දෙකක් විය. වින්සන්ට් මහතා එක් පුටුවක සුවපහසු ලෙස හාන්සි වී අමුත්තාටද ඇරැුයුම් කළේය.
‘‘දැන් ඊළඟට මොනවද කරන්න ඕනෑ?’’
අමුත්තා විමසීය.
‘‘කිසිම දෙයක් අමුතුවෙන් කරන්න අවශ්‍ය වන්නේ නැහැ. හොඳ සැප පහසුවට ඔය පුටුවේ දිගා වෙලා අර ලස්සන අහස දිහා බලන්න. මේ පිරිසිදු නැවුම් වාතය පෙනහළු පුරා හුස්ම ගන්න. දැනට එපමණයි.’’
‘‘මේක අභ්‍යාසයක් නොවෙයිනේ? සාමාන්‍යයෙන්  ඕනෑම කෙනකු කරන දෙයක්නේ?’’
‘‘මෙහිදී ඔබ නොදන්න විශේෂත්වයක් තිබෙනවා. ඔබ සාමාන්‍යයෙන් නිවසේදී කරන්නේ පුටුවේ හිඳගෙන ප‍්‍රශ්නවලින් ඔලූව පුරවාගන්න එකයි. එහෙත් දැන් අපි කරන්න හදන්නේ අපේ ප‍්‍රශ්න එකින් එක ඉහළ හිස් අහසේ අනන්තයටම මුදාහරින එකයි. ඔබේ ගැටළුව හිස මතින් ගුවනට මනසින් විද දමන්න. එය කුඩා තිතක් බවට පත්වී නොපෙනී යන තුරුම.’’
අමුත්තා නිහඬවම හිස් අනන්තයට සිය දෙනෙත් යොමන්නට විය. අඩහෝරාවක් පමණ එසේ ගතවන්නට ඇත. උණුසුම් තේ බඳුන් රැගෙන සේවකයකු පැමිණ සිටියේය. අමුත්තාගේ විඩාබර කනස්සලූ පෙනුම පහවී ගොස් තිබිණි.
‘‘ඇත්තටම එය ඵලදායකයි.’’
‘‘මේ අපූර්ව විශ්ව ශක්තියෙහි ඔබව සුවපත් කිරීමට බලය තිබෙනවා. අද දිනය ඉතා ශුභ දිනයක් බව මා පැවසුවා මතකද? බලන්න. ඔබත්, මමත් ජීවත් වන්නේ අද. මේ මොහොතෙදි අප කිසිම උපද්‍රවයක් නැතිව සුවසේ හුස්ම ගනිමින් ඉන්නවා. අනෙකුත් හැම ප‍්‍රශ්නයක්ම පවතින්නේ ජීවිතයට ඉතාම පහළින්. එම ගැටළු විසඳාගැනීමට විශ්ව ශක්තිය ආධාර කරගැනීමේ එක් අභ්‍යාසයක් තමයි ඔබ දැන් ප‍්‍රගුණ කළේ?’’
‘‘අද ඉතා ශුභ දිනයක් බව ඔබ පැවසූයේ පෙරදිග ජ්‍යෙතිෂ ශාස්ත‍්‍ර ගැන ඔබගේ විශ්වාසය තිබෙන බැවින්ද?’’
‘‘නැහැ. මා එය හදාරා නැහැ. එහෙත් උදාවන හැම දිනයක්ම ඉතා ශුභ දිනයක් බවට පත්කරගැනීමේ මන්ත‍්‍රයක් මා උදෑසන තුන්වරක් ජප කරනවා.’’
‘‘ඇත්තටම මා එය ඉගෙන ගැනීමට කැමැතියි.’’
විශ්වයේ මහිමයෙන් මා ලැබූ මේ දිනයෙහි ප‍්‍රීතියෙන් හා සතුටින් ගත කරමි.
‘‘ඔය තමයි මා ජප කරන මන්තරේ. ප‍්‍රීතියෙන් හා සතුටින් ජීවත්වීමේ පුරුද්ද ඇතිකර ගන්න මාගේ මිත‍්‍රයා, එවිට උදාවන හැම දවසක්ම ශුභ දවසක් වේවි.’’
රංජිත් වික‍්‍රමසිංහ
(උපුටා ගැනීම මාර්තු කලාපයෙන්)

No comments:

Post a Comment