ඉංග‍්‍රීසියෙන් Reincarnation නැත්නම් Rebirth එය නමින්ද සිංහලෙන් පුනරුත්පත්තිය නැත්නම් නැවත ඉපඳීම නමින්ද හඳුන්වන සංසිද්ධිය මුල්කොට ලියැවී ඇති පත පොත රාශියකි. ඉදිරිපත්වී ඇති මතවාද හා මතිමතාන්තරද අප‍්‍රමාණය. සිදුකර ඇති පර්යේෂණ හා විමර්ශන ද එමටය. එම නිසා, මෙම ලිපිය කියවන ඔබ දැනුවත් මෙම විෂය පිළිබඳ කිසියම් මතයක එල්බ සිටින්නට ඉඩ කියයි. නොඑසේ නම් මේ පිළිබඳව තවදුරටත් කරුණු සෙවීමේ කුතුහලයෙන් පසුවෙන්නට ඉඩ තිබේ.
ඒ කෙසේ වුවත් කේම්බි‍්‍රජ් වැනි ලෝපතල විශ්වවිද්‍යාලයකින් සෛද්ධාන්තික භෞතික විද්‍යාව හැදෑරූ, ඉනික්බිති අවුරුද්දක කාලයක් විද්‍යා ගුරුවරයකු ලෙස ගුරු වෘත්තියේ යෙදී සිටි, ඉන් අනතුරුව තායිලන්තයට ගොස් අවුරුදු නවයක කාලයක් වනගත සම්ප‍්‍රදායට අනුව මහණදම් පිරූ, බොහෝ ඇසූ පිරූ තැන් ඇති, එමෙන්ම අප‍්‍රමාණ අත්දැකීම් ඇති අජාන් බ‍්‍රහ්මවංසෝ මහතෙරුන් වහන්සේ පුනරුත්පත්තිය නැත්නම් නැවත ඉපදීම පිළිබඳව පළකරන අදහස් නිසැක වශයෙන් මෙම විෂය පිළිබඳ ඔබේ අවබෝධය පුළුල් කරනු ඇත. නැවත ඉපදීම පිළිබඳ ඔබේ සිතේ යම් සැකයක් ඇත්නම් එය දුරලීමටද උන්වහන්සේ ඔබට උදව් වෙනවා ඇත. එමෙන්ම නැවත ඉපදීම ගැන දැනගත යුතු දේවල් දැන වර්තමාන ජීවිතය සාර්ථක කරගැනීමටත්, මරණයට නොබියව මුහුණ පෑමටත් ඔබට, මහත් ආලෝකයක් හා ශක්තියක් ලබා දෙනු ඇත.
ඒ අනුව ජීවිතයට දහම් පාසල සඟරාවට සිනාසෙන සුදු හාමුදුරුවෝ නමින් අප සපයන ලිපි මාලාවේ ඉදිරි ලිපි කිහිපය අජාන් බ‍්‍රහ්මවංසෝ මහතෙරුන් වහන්සේ අපේ මරණයෙන් පසු අපට සිදුවන්නේ කුමක්ද? මැයෙන් ඉදිරිපත් කළ දේශන ඇසුරෙන් සකස් වේ.
අපේ මරණයෙන් පසුව අපට සිදුවන්නේ කුමක්ද?
ඉහත මාතෘකාව යටතේ උන්වහන්සේ පැවැත්වූ දේශනයේදී දැක්වූ අදහස් කිහිපයකින් මෙම ලිපි මාලාව ආරම්භ කරන්නෙමු.
‘‘ඔබට ඔබේ මරණයෙන් පසුව සිදුවන්නේ කුමක්ද? යන්න පිළිබඳව ගැඹූරු භාවනාවන්හි නිරතවී සිටින විට මනා වැටහීමක් ලබාගත හැකිවෙනවා. මේ හැර මරණයෙන් පසුව ඔබට සිදුවෙන්නේ කුමක්ද පිළිබඳව සාක්ෂි පාදක කරගත් යම් යම් අනාවරණ තිබෙනවා. තාවකාලිකව මරණයට පත්වී, මනස සිරුරෙන් වෙන්වී, ආපසු මනස සිරුරට එක්වූ තැනැත්තන්, එම විරාමය නැත්නම් තාවකාලික මරණය හා නැවත ප‍්‍රාණය ලැබීම අතර කාලය තුල ලත් අත්දැකීම් පිළිබඳ අනාවරණවලින් මරණයෙන් පසුව සිදුවන්නේ කුමක්ද පිළිබඳව අවබෝධ කරගැනීමට අප‍්‍රමාණ සාක්ෂි තිබෙනවා. ඒ හැර ස්වල්ප දෙනකුට ඔවුන්ගේ පෙර ජන්මය පිළිබඳ මතකයක් තිබෙනවා. මෙය සමහරවිට සමහරුන්ට නිරායාසයෙන්ම ලැබෙන්නක්. තවත් සමහරුන්ව පුහුණු කිරීමෙන් ලඟාවිය හැකි තත්ත්වයක්.’’
මරණයට පත්වීමට ආසන්න වූ විට ඔබට සිදුවන්නේ කුමක්ද?ජීවිතය කියන්නේ අඛණ්ඩ ගමනක්. ඔබ රාත‍්‍රියේදී නින්දට ගොස් පසුදා උදේ අවදි වනවිට උදේ අවදි වුණේ රාත‍්‍රියේ නින්දට ගිය පුද්ගලයාමයි. සමහරවිට නින්දට යන්නට පෙර සිටියාට වඩා තරමක් වයස්ගතවී තිබුණත් උදේ අවදිවන්නේ රාත‍්‍රී නින්දට ගිය තැනැත්තාමයි. ඔබ මරණයට පත්වූවාට පසුවත් සිදුවෙන්නේ මෙයම තමයි.’’
‘‘අප මරණයට පත්වීමට ආසන්නව සිදුවෙන්නේ කුමක්ද කියා විමසීමේදී මා අවධානය යොමු කරන්නේ අනතුරකින් නැත්නම් ශල්‍යකර්මයක් මැද්දෑවේ සිදුවූ හදිසි මරණයක් ගැන නොව අසනීපයකින්, වියපත්වීමකින් නැත්නම් රෝගාතුර වීමකින් වැනි දෙයකින් සිදුවෙන සෙමින් මරණයට පත්වීමක් ගැනයි. එය සිදුවෙන්නේ අපේ පංචේන්ද්‍රිය, ඒ කියන්්නේ ඇසින් දැකීම, කණෙන් ඇසීම, නාසයෙන් සුවඳ දැනීම, දිවට රසය දැනීම, කයෙන් පහස ලැබීම ආදිය එකිනෙක අකර්මන්‍ය වීමෙන් නැත්නම් එම ඉඳුරන්ගේ ක‍්‍රියාකාරීත්වය ශරීරයෙන් වෙන්වීමෙන්. බෞද්ධ භික්‍ෂුවක් විදියට බොහෝ දෙනකු මරණාසන්නව සිටි අවස්ථාවලදී මරණය සිදුවෙන්නේ කෙසේදැයි දැක බලා ගැනීමට මා භාග්‍යවන්ත වී තිබෙනවා.
මරණය පසිඳුරන් අතුරුදහන් වීමෙන් සිදුවෙන ක‍්‍රියාවලියක්
මරණය සිදුවෙන්නේ, විශේෂයෙන්ම වියපත් වූවකුගේ, රෝගාතුරවූවකුගේ, එහෙම නැත්නම් කිසියම් ලෙඩක් නිසා මරණාසන්න වූවන්ගේ මරණය සිදුවෙන්නේ සෙමින්. මම මුලින්ම මේ විදිහට සිදුවෙන මරණ දැක්කාම මරණය සිදුවෙන්නේ මෙන්න මේ වේලාවටයි. අටටයි නැත්නම් නමයටයි කියා කියන්න බැරි මිනිත්තු ගණනක් තිස්සේ සිදුවෙන ක‍්‍රියාවලියක් පටන් අරගෙන සෙමින් සෙමින් අවසානයට පත්වෙන ක‍්‍රියාවලීන් හිටිහැටියේ සිදුවන දෙයක් නොව ක‍්‍රියාවලියක් යැයි මා කියන්නේ මේ නිසයි. මෙය මුළු ජීවිතයම තේරුම් ගැනීමට බොහෝම ප‍්‍රයෝජනවත් වෙනවා. තව විදියකින් කිව්වොත් තවත් ඉතින් ඇසීමක්, දැකීමත්, ගඳ සුවඳ දැනීමත්, රස විඳීමත්, ස්පර්ශයත් සිරුරට දැනෙන්නේ නැහැ. කෙනකු මරණයට පත්වූ බව අප දැනගන්නේ මෙන්න මෙහෙමයි.
ඒත් අපි කෙනෙක් මැරුණය සිතමින් හඬා දොඩා වැළපෙද්දිත් ඔහු හෝ ඇය තවමත් ජීවත්වෙමින් සිටින්න පුළුවන්. අපි ඒ තැනැත්තා මරණයට පත්වූවායැයි තීරණය කළත්, හෙදියන් නැත්නම් වෛද්‍යවරුන්ට මරණය කරා ආසන්න වෙමින් සිටින තැනැත්තාගේ ඇස්වල ජීවයක් දකින්න පුළුවන් වෙන්න ඉඩ තිබෙනවා.
භාවනාවේදී සිදුවෙන්නේ මේකම තමයි
භාවනාව තුළින් මා වටහාගත් එක් දෙයක් තමයි, භාවනාවේදී සිදුවෙන්නේ මෙන්න මේ ක‍්‍රියාවලියමයි කියන එක. භාවනාවේ ගැඹුරට යනවිට ඔබේ සිරුරෙහි ම පස් ඉඳුරන්ම සිරුරෙන් අතුරුදහන් වෙනවා. ඔබ භාවනාව සඳහා හිඳගත්විට ඔබට මේ වගේ අත්දැකීමකට, ආසන්න අත්දැකීම් අත්විඳින්න පුළුවන් වෙනවා. ටිකෙන් ටික ඔබට ඔබේ අත්, පය, සිරුර එහා මෙහා කරන්නට බැරිව සිරුර ඔබෙන් අතුරුදහන් වෙනවා. සෙමින් සෙමින් මරණයට පත්වීමේදී සිදුවෙන්නෙ මේකම තමයි. හැබැයි ඔබ භාවනා කිරීමේදී මිය යන්නේ නැහැ. ඔබට භාවනාව නිමකොට සිහි එලවා ගන්න පුළුවන් වෙනවා. නමුත් මරණයේදී එය නිමක් දකිනවා. පස් ඉඳුරන්ව සිරුරෙන් අතුරුදහන්වී අවසානයට පත්වෙනවා. සිරුර පංච ඉන්ද්‍රියන්ගෙන් ලබාගත් වින්දනයන් සහමුලින්ම නැත්තටම නැතිවී යනවා. මේ විදියට භාවනාව නිසා පසිඳුරන් ඔබේ ශරීරයෙන් අතුරුදන්වීමෙන් ඔබට විශාල සැහැල්ලූවක්, සතුටක්, සැනසීමක් අත්විඳින්න ලැබෙනවා.
ගැඹුරු භාවනාවේදී සිදුවූ සැබෑ සිද්ධියක්.
ගැඹුරු භාවනාවේදීත් සිදුවෙන්නේ මෙයම තමයි. මා මේ සම්බන්ධ සිද්ධියක් දැන් ඔබට කියන්නම්. මා මේ කියන්න යන්නේ මෙහි අපේ දායකයකු සම්බන්ධ සිද්ධියක්. අද සැඳෑවේ නම් ඔහු මෙහි ඇවිත් නැහැ. ඔහුගේ අවසර ඇතිව මම මේ කතාව මගේ පොතකද පළකළා.
ඔහු ඉතා ගැඹුරු භාවනාවන්හි නියැලෙන කෙනෙක්. දවසක් ගෙදර, කාමරයේදී ගැඹුරු භාවනාවකට සමවැදී සිටි ඔහු ගැන විපරම් කළ ඔහුගේ භාර්යාව තම සැමියා කිසිම සද්දයක් නොකර නිසොල්මන්වී සිටින හැටි දැක්කා. ඇඟපත අල්ලා සෙලවූවත් ඔහු අවදි වුණේ නැහැ. තම සැමියා මරණයට පත්වෙන්නට ඇතැයි සිතූ ඇය, ගිලන් රථයක් කැඳවා ඔහු චාල්ස් ගාර්ඩන් රෝහලට රැගෙන ගියා. රෝහලේදී ECG හා EEG පර්යේෂණවලින් ඔහුගේ හෘද වස්තුවත්, මොළයත් සක‍්‍රීයව තිබෙනවාදැයි පිරික්සුවත් ඒවා අකර්මන්‍ය වී තිබුණා. පරීක්‍ෂණයේදී ELG හෘදවස්තුව දිගු වේලාවක් තිස්සේ ස්පන්දනය නොවන බවත්, EEG පරීක්‍ෂණයේදී මොළය අක‍්‍රියව ඇති බවත් අනාවරණය වුණා. ඉන්පසු විදුලිසැර වැද්දීම්, පපුව තෙරපීම වැනි නොයෙකුත් හදිසි ප‍්‍රතිකාර කළත් ඔහු ජීවත්වෙන ලකුණක් දැක ගන්නට ලැබුණේ නැහැ. මේ අතරවාරේ ඔහු, ඔහුගේ භාවනාව නිමකොට, පියවි සිහියට එළඹුණා. ඔහු භාවනාව නිමකළ සැනෙන් ECG යන්ත‍්‍රයත්, ක‍්‍රියාකාරී වෙන්නට පටන් ගත්තා. ඔහු වටපිට බලනවිට තමා රෝහලක සිටින්නේ මක්නිසාදයැයි විශ්මයට පත්වුණා. වෛද්‍යවරු බොහෝම කඩිනම් පරීක්‍ෂණයක් කළත් ඔහු ගැන කියන්නට කිසිම වරදක් නැති බව හෙළිවුණා. ඉන්පසු ඔහු ආපසු ගෙදර ගියා. ඇත්තටම ඔහු රෝහලේ සිට ආපසු පයින්ම ගෙදර ගියා. පයින් ආ හැකි තරමට ඔහු නිරෝගීව සිටියා.
විශ්මයජනක කාරණය නම් මේ කියන මුළු කාලය තුළ ඔහු හොඳ සිහියෙන්, සෝදිසි ඥාණයෙන් යුක්තව සිටීමයි. මා මේ කතාව කිව්වේ මේ කතාවට සම්බන්ධ තැනැත්තා මෙහි එන යන අයකු කියාත්, ගැඹුරු භාවනාව තුළින් සිදුවෙන්නේ කුමක්දැයි හඳුනාගැනීමට මේ කතාව ප‍්‍රයෝජනවත් වන නිසාත්ය. මේ විදිහට මොළයේ ක‍්‍රියාකාරීත්වය නතර වූ විට සිදුවෙන්නේ කුමක්ද යන්න පිළිබඳ මෙවැනි සාක්ෂි අප‍්‍රමාණව තිබෙනවා. මෙවැනි අවස්ථාවල තාවකාලිකව මරණයට පත්වීමක් සිදුවෙන නිසා අපි මෙවැනි අවස්ථා මරණාසන්න අත්දැකීම් ලබාදෙන (Near Death Experience) අවස්ථාව ලෙස හඳුන්වනවා. දීර්ඝ කාලීන ලෙස, සහමුලින්ම මරණයට පත්වීම, අපි මරණය නමින් හඳුන්වනවා. මොළයේ කි‍්‍රයාකාරීත්වය නතර වුණාම සිදුවෙන්නේ කුමක්ද යන්න ඒත්තු ගැනීමට මේ මඟින් යම් යම් සාක්ෂි අපට ලබාදෙනවා. මොළයේ ක‍්‍රියාකාරීත්වය නතරවීමෙන් සිදුවෙන තාවකාලික මරණය පිළිබඳ වැදගත්ම කාරණය නම් එය ඉතා ආනන්දජනක අත්දැකීමක් වීමයි. ප‍්‍රමෝදජනක අත්දැකීමක් වීමයි. මේ අත්දැකීම අත්විඳි සියල්ලන්ටම එය එසේමයි.
බ‍්‍රහ්මවංසෝ තෙරුන් ඇසින් දකිමු.
සිනාසෙන සුදු හාමුදුරුවෝ
සමරසිංහ ගුණසේකර
(උපුටා ගැනීම මාර්තු කලාපයෙන්)
(උපුටා ගැනීම මාර්තු කලාපයෙන්)
No comments:
Post a Comment