හදවත දිනන රහස

‘‘මා අකමැති කිසිම පුද්ගලයකු මා හට මෙතෙක් මුණගැසී නොමැත.’’
ධනාත්මක චින්තකයකු වන වින්සන්ට් පීල් නම් අමෙරිකානු ජාතිකයා එසේ පවසා ඇත. ඔහු එවකට ජීවත් වූ සමාජයේ ඉතා ජනප‍්‍රිය පුද්ගලයකු විය. ඉතා ධනවත් ව්‍යාපාරික මිතුරු පිරිසක් ඔහුගේ ඇසුර නිරතුරුවම පැතූහ.
වින්සන්ට් පීල් මෙතරම් ප‍්‍රියමනාප වූයේ ඇයි? ඔහු හැමදෙනාගේම හදවත් දිනා ගත්තේ කෙසේද?
ඔහු සෑම දෙයක් පිළිබඳවම සුභවාදී ආකල්ප දැරූවෙකි. එක් තද වැසි සහිත දිනයක තම අසල්වැසියාගේ ගරාජය තුළට වැසිදිය සමග රොන්මඩ ගලාවිත් එතුළ වූ සියල්ල අපවිත‍්‍ර වී තිබිණ. අසල්වාසී ටොම් මේ පිළිබඳ මහත් කනස්සල්ලට පත්වී සිටියේය.
‘‘මේ බලන්න ටොම්, ඔබ හුඟ කාලෙකින් ගරාජය ශුද්ධ පවිත‍්‍ර කරල නැහැ. දැන් ඔබට හොඳ අවස්ථාවක් ඇවිත් තියෙන්නෙ මේක පිරිසිදු කරල දමන්න.’’
වින්සන් සිය අසල්වැසියා ධෛර්යමත් කරවීය.
‘‘මා හට මුණගැසුණු සෑම පුද්ගලයකු
තුළම තිබෙන හැකියාවන් මම හඳුනාගත්තා. ඔවුන් හට ජීවිතයේ සුභවාදී පැත්ත පෙන්වා දුන්නා. ඔවුන් ධෛර්යමත් කළා.’’
‘‘මිතුරුදමක් ගොඩනගා ගැනීම වෙනුවෙන් ඔබ සතයක්වත් වැය කළ යුතු නැහැ. වැඩි මහන්සියක්ද දැරිය යුතු නැහැ. එහෙත් ආත්මාර්ථකාමී බවින් තොරවම ඔබ ඔවුන් ප‍්‍රිය කළ යුතුයි.’’
වර්ෂ 1953 දී (Guidepost) ගයිඞ්පෝස්ට් නම් මාසික සඟරාවේ ඔහු එසේ සඳහන් කොට තිබිණි. හදවත් දිනන රහස් පියවර දහයක් ලෙස එහි සඳහන් විය.
1. කෙනකුගේ නම මතක තබා ගන්න.  ඕනෑම අයකු හට තමාගේ නම ඉතා වැදගත්.
2. සැමවිටම සැහැල්ලූ ගති පැවතුම් ඇතිකර ගන්න. එවිට ඔබ ළඟ සිටින්නා අසීරුවට පත් නොවේ.
3. අනවශ්‍ය ලෙස හදිසිකාරයකු නොවන්න. එවිට ඔබේ දෛනික කටයුතු පහසු වෙනවා මෙන්ම ඔබේ මිතුරන්ද සැහැල්ලූවට පත්වනු ඇත.
4. ඔබේ අදහස පමණක් ඉස්මතු වන සේ කටයුතු නොකරන්න. සාවධානව අන් අයගේ අදහස්වලටද ඇහුම්කන් දෙන්න. ඔබට රස දේ තව කෙනකුට
වස විය හැකිය.
5. ප‍්‍රිය මනාප බව ඇතිකර ගැනීමට හුරුවන්න. ඔබේ කාරුණික, සංවේදී බව වඩාත් ප‍්‍රියමනාප පුද්ගලයකු බවට පත්කරයි.
6. ප‍්‍රසිද්ධියේ නාසය සීරීම්, කෙළ ගැසීම් වැනි පුරුදු ඔබගේ චරිතයෙන් ඈත් කර දමන්න.
7. ඔබේ දුර්ගුණයන් තිබේ නම් එයින් ක‍්‍රමක‍්‍රමයෙන් අත්මිදෙන්න. මැසිවිලි නැගීම් හා නෝක්කාඩු කීම් ඔබේ මුවින් පිටවීම වළක්වා ගන්න.
8. ඔබ අවංකවම මිනිසුන් අගය කිරීමට හුරුවන තුරුම එය නොකඩවා කරගෙන යන්න.
9. කෙනකුගේ සුළු ජයග‍්‍රහණයකදී පවා සුභ පැතීමට අමතක නොකරන්න. එමෙන්ම කෙනකුගේ විපතකදී අවංකවම ශෝකය ප‍්‍රකාශ කරන්න.
10. යහපත් දෙයක් ඔබේ මිතුරන් හට දිය හැකි බව විශ්වාස කරන්න. ධෛර්යමත් කිරීමෙන් හා යහපත් දේ පෙන්වා දීමෙන් ඔවුන් ශක්තිමත් කළ හැකිය. ඔවුන් විසින් පෙරළා ලබා දෙනු ලබන ගෞරවනීය ලයාන්විත බව ඔබව ශක්තිමත් කරනු ඇත.

රංජිත් වික‍්‍රමසිංහ

(උපුටා ගැනීම පෙබරවාරි කලාපයෙන්)