සෑම කළු වලාවකම රිදී රේඛාවක්ද, ඉඩෝරයට පසුව වැස්සද, කන්ද නැඟි පසුව පල්ලමක්ද ඇත. මේවා හුදෙක් නිකම්ම කියමන් පමණක් නොවේ.
කෙනකුගේ ජීවිත කාලය සමාන්තර රේඛාවක් සේ කිසිදින ගෙවෙන්නට නැත. එහි නැඟීම් මෙන්ම බැසීම්ද පවතී. යම් යම් දුර්භාග්ය සහිත කාලපරිච්ඡේදයන් පසු කරන පුද්ගලයෝ උදාවෙන අනාගතය සාර්ථකව ගත කරති.
අවාසනාව පසුපස හඹා ආ වාසනාව පිළිබඳ එක් සත්ය කතාවක් මෙහි සඳහන් කළ යුතුය. අවුරුදු විසිපහකට පමණ පෙර සෙල්ලකතරගමදී පස් වියැති කුඩා දැරියක් පාරේ ගිය වාහනයක ගැටිණි. මීටර් විස්සක පමණ දුර දැරිය විසි වී ගියාය.
මෙම අවාසනාවන්ත සිදුවීමෙන් කලබලයට පත් දැරියගේ පියා වාහනය පදවාගෙන ආ පුද්ගලයාට තර්ජනය කරමින් පහරදීමට සැරසිණි.
‘‘කලබල වෙලා වැඩක් නැහැ. අපි දරුවා ගැන බලල ඉඳිමු. වාහනය පදවාගෙන ආ තැනැත්තාගේ ඉල්ලීම විය. වාසනාවකට මෙන් දැරියට සුළු සීරුමක් හැරුණු විට බරපතල හානියක් සිදුවී නොතිබිණි. දැරියගේ පියා වන්දියක් ලෙස යම් මුදල් ප්රමාණයක් ඉල්ලා සිටියද
‘‘නැහැ අපි දරුවා රොහලට රැගෙන යමු.’’
පසුව රෝහලේදී සිදුකළ පරීක්ෂණයෙන් දැරියට කිසිදු අවදානම් තත්වයක් නොමැති බැව් සහතික කෙරිණි. එම අවාසනාවන්ත සිදුවීම පසුපස කුඩා දැරියගේ වාසනාව රැඳී තිබූ සේය. එදා අනතුරට මුහුණ දුන් කුඩා දැරිය අද තරුණියකි. ඇයගේ අධ්යාපන කටයුතු වෙනුවෙන් එදා සිට අද දක්වා සියළු බරපැන දරනු ලබන්නේ වාහනය පදවාගෙන ආ මහතා විසිනි.
දැරියගේ පියා ඉල්ලා සිටි මුදල ලබා දී ඇඟ බේරාගෙන යාමට ඔහුට අවස්ථාව තිබිණි. එහෙත් මොළයෙන් දෙන පණිවුඩයට වඩා හදවතේ පණිවුඩය බලවත් විය.
මේ ලෝකය කාරුණික පුද්ගලයින්ගෙන් පිරී ඇති බැව් මම සිතමි. මෙවන් ත්යාගශීලින් ස්වල්ප දෙනකු පිළිබඳව මම පෞද්ගලිකව හඳුනමි. මා ඉහත සඳහන් කළ මහතා යම් දරුවකු වෙනුවෙන් උපකාරයක් කළ විට මෙසේ පවසනු ඇසීමි.
‘‘මා මේ උදව්ව ඔබ වෙනුවෙන් කරනුයේ ඔබෙන් ප්රතිඋපකාරයක් බලාපොරොත්තුවෙන් නොවේ. නමුත් ඔබ යම් දවසක මා ඔබට උපකාරී වූවා සේ තවත් දුප්පත් ළමයකුට උපකාර කළ යුතුයි.’’
මෙවන් අයුරින් ධන පරිත්යාග කිරීම පිණිස ඔබ සතු වත්කම ප්රමාණවත් නොවිය හැක. එහෙත් ඉතා සුළු වශයෙන් හෝ තවත් කෙනකුට හට උපකාරී වීම ඔබට කළ හැකිවනු ඇත. ඔබේ සිනහමුසු මුවඟින් පිරිනැමෙන සුභ පැතුම තවකකු දිරි ගන්වයි. ඔබ විසින් පිරිනමනු ලබන දෙයම පෙරළා ඔබ වෙත පිරිනැමෙනු ඇත.
රංජිත් වික්රමසිංහ
(උපුටා ගැනීම අප්රේල් කලාපයෙන්)
